எந்த வெளி நடப்பும் இல்லாமல்
தினம் தினம் மாலையில் கூடி பேசுகின்றன
வயல் வெளியில் காக்கைகள் !
*

இந்திய நதிகள்

 இணைக்கப்படுகிறது

ஒவ்வொறு தேர்தல் அறிக்கையிலும் !

*

இந்த வார  ( 19/01/2015) குங்குமம் இதழில் பதிவாகியுள்ளது.

எத்தனை ஆண்டுகளாயினும்
போகியில் பொசுக்க முடிவதில்லை.
அரும்பு மீசை காலத்திய
அவளின் பொங்கல் வாழ்த்து அட்டையை !

*

 பொய் எனத் தெரிந்தும்
போதையூட்டத்தான் செய்கிறது
காதலன் சொல்லும் கவிதைகள் !

*

நொடி நொடியாய்

 என் பொழுதை திருடும் 

உன் அழகை  ரசிக்க விடாமல் செய்யும் 

அந்த கொஞ்சநேர தூக்கத்தை 

 என்ன செய்ய ?

*

உண்மை தான்.
ஒரு போதும் என்னைப் புகழ்ந்து கவிபாட விடாமல்
உன்னை மட்டுமே புகழ்ந்து கவி படைக்கும் நான்
ஒரு ஆணாதிக்கவாதி தான்.

*

என்னை
நாளொரு வண்ணம்
பொழுதொரு கவிதையென
சொல்லச் சொல்லி ரசிக்கும்
உன் பெண்ணாதிக்கம் வாழ்க !

*

 

அவங்க உங்களை போலவே இருப்பாங்க
எனும் போது ஓடி ஓடி எடுத்துவருமந்த
துணிக்கடை பெண்ணுக்கு கிடைக்கும்
அந்த நிமிட மகிழ்ச்சி அலாதியானது !

*

அவளை 

இப்போது 

பார்த்தாலும்
கேட்கத் தோணும்,

கணக்கு புத்தக 25 ம் பக்கத்தில்
அடை வைத்த 

மயிலிறகு
குட்டி போட்டதா ?

என்று !
*
- மன்னை முத்துக்குமார்.

போன
வேகத்தில்
திரும்பின
சொந்த தேசத்து
பறவைகள் ;

இன்னும்
துளிர்விட மறந்த
மரங்களும் , மனிதர்களும்
அங்கே !
*

- மன்னை முத்துக்குமார்.

 அலைகளும்
உன் நினைவுகளைப்
போல தான் .

எத்தனை முறை
கடலுக்குள் போனாலும்
திரும்ப வந்து விடுகிறது
அதே வேகத்தில் ! 

***

.

எனக்கு பிடிக்காத  

விசயங்களை சொல்லும் போது  

ஏனென்று கேட்ட நீ

எனக்கு பிடித்து 

உனக்கு பிடிக்காத விசயங்களை 

சொல்லும் போது மட்டும் 

மெளனிக்கிறாய் !

-

-மன்னை முத்துக்குமார்.

அவளை இப்போது பார்த்தாலும்
கேட்க தோணும் கணக்கு புத்தக 25 ம் பக்கத்தில்
அடை வைத்த மயிலிறகு குட்டி போட்டதா என்று ?
*

-மன்னை முத்துக்குமார்.

அசைந்து விடைகொடுத்தது
வண்ணத்து பூச்சியின் அழகை ரசித்த செடி !

*

அம்மா,
அப்பா, அக்கா, தங்கை ,

உறவை

 .
.
.
இன்னொரு முறை கொடுத்து
உறவையும் அழகுப்படுத்தியவன்
நண்பன் !
*
-மன்னை முத்துக்குமார்.

சத்தம் போடாதே...
இன்று தான் அவள்
இடையூறில்லாமல்
தனியாக உறங்குகிறாள்.

விலை மாதுவின் கல்லறை !
*

-மன்னை முத்துக்குமார்.

தந்தையான பிறகு தான் புரியும்
முத்தம் காமத்தில் சேராது என்று !
*
-மன்னைமுத்துக்குமார்.

நீ..
பெரியவளானதை
என்னிடம் சொல்ல கூசிய போது புரிந்தது
நம் நட்பை எத்தனை பெரிதாய்
மதிக்கிறாய் என்று !
***

 அவனுக்கு பொம்பள புள்ளைங்க தான் 

பிரண்டு என்று  புறம் பேசியவனுக்கு 

தெரிய வாய்ப்பில்லை.

நட்பு பாலின பேதங்களற்றது என்று !

***

 நட்பு !
வார்த்தையல்ல.

வேதம்
வாழ்க்கை
உயிர்மூச்சு .

***

 
நண்பர் என்பதை விட நண்பன் எனபதில்
உண்மையும் அழுத்தமும் அதிகம் !

***

 அவன் இவன் என்பது நட்பின் அடர்த்தியை
வெளிப்படுத்தும் வார்த்தைகள் !

***

 
ஆறு மாத குழந்தைக்கு
காதல் தெரியாது..
ஆனால்
அதன் வயதொத்த
குழந்தையை கண்டால்
நட்பு பாராட்டும் ..

எல்லாத்துக்கும் மேல நட்பு !

***

 
பசி, காதல் , பாசம், செக்ஸ் ...
எதைப் பற்றியும் பேச
நண்பனிடம் மட்டுமே முடியும் !

***

 

 தோழியின் நட்பை பற்றி சொல்லும் போது
பூரிப்படையும் மனைவி கிடைத்தவன்
பாக்யவான் !

***

 
அம்மா அப்பாவை
தாண்டி கோபம் செல்லுபடியாகும்
ஒரே இடம் நட்பு !

***

-மன்னை முத்துக்குமார்.

.

புகைப்படம் : நவீன்  கெளதம்.

மழை
மனதையும்
நனைத்து செல்கிறது !

*

-மன்னை முத்துக்குமார்.

வலிக்க தான் செய்கிறது
பால்ய கால நண்பன் பார்த்தும்
பார்க்காதது போல் செல்கையில் !
*

உந்தாங்கொம்பு
நூறாங்குச்சி
கில்லி/கிட்டிப்புல்
குதிரையேத்தம்
கபடி
ரேக்ளா..
.
.
.
சூதாட்ட
விளையாட்டுக்களால்
சூரையாடப்பட்டவைகள் !
*

-மன்னை முத்துக்குமார்.

விசித்திரம் !

அன்பானவர்களிடம்
தோற்றுப் போவது கூட
மகிழ்ச்சியையே தருகிறது !
*
- மன்னை முத்துக்குமார்.

பெரிதாய் ஏதும்  சம்பாதிக்கவில்லை
என்று  சொல்கிறார்கள் ;

நம்மை
இத்தனை காலம்
இப்படி 

பார்த்தவர்கள் !
*

 -மன்னை முத்துக்குமார்.